Kolegji Universitar Bedër

Kolegji Universitar Bedër do të akordojë 100 Bursa Ekselence për maturantët me rezultate të larta, të cilët zgjedhin të regjistrohen në një nga programet për vitin akademik 2018-2019. Kjo nismë mbështetet në misionin dhe vizionin që ka universiteti, si dhe në planin strategjik të institucionit për vitet 2018-2023. Nëpërmjet kësaj mbështetjeje, “Bedër” synon të rrisë më tej cilësinë dhe të nxisë konkurrencën në dobi të rritjes së nivelit të studentëve. Në këtë kuadër, bursat do të jepen si më poshtë: 100% bursë për maturantët me mesatare 9.5-10, 75% bursë për maturantët me mesatare 9.0-9.5, 50% bursë për maturantët me mesatare 8.5-9.0, 25% bursë për maturantët me mesatare 8.0-8.5.

Për të dytin vit radhazi Kolegji Universitar Bedër mundëson programin e 100 Bursave Sociale, për studentët që vijnë nga familjet në nevojë, për studentë me aftësi të kufizuara, për persona me fatkeqësi familjare, për fëmijët e dëshmorëve, si dhe për kategori të tjera. Nëpërmjet këtij projekti, “Bedër” synon t’i lehtësojë edukimin këtyre studentëve që vijnë nga këto kategori sociale.